پشاور کی خیبر میڈیکل یونیورسٹی نے صوبے میں میڈیکل اینڈ ڈینٹل کالج داخلہ ٹیسٹ (MDCAT) کے دوبارہ انعقاد کی تاریخ کا باضابطہ اعلان کر دیا ہے۔

اعلان کے مطابق ایم ڈی سی اے ٹی 26 نومبر کو کے پی کے میں دوبارہ لیا جائے گا۔ خیبر میڈیکل یونیورسٹی (کے ایم یو) ٹیسٹ کو دوبارہ ترتیب دینے کی ذمہ دار ہوگی۔

اپنے بیان میں یونیورسٹی نے کہا کہ اس نے شفافیت کو یقینی بنانے کے لیے وفاقی تحقیقاتی ادارے اور پولیس سے مدد طلب کی ہے۔ KMU کے مطابق، 46,658 طلباء نے اگلے ماہ ہونے والے ٹیسٹ کے لیے رجسٹریشن کرائی ہے۔

اس سے قبل صوبائی حکومت نے 19 نومبر کو دوبارہ امتحان لینے کی تجویز دی تھی لیکن اب اسے مزید ایک ہفتہ بڑھا دیا گیا ہے۔ پاکستان میڈیکل اینڈ ڈینٹل کونسل (پی ایم ڈی سی) کو اس حوالے سے کے پی حکومت کی جانب سے ایک خط بھی موصول ہوا تھا۔

اپنے خط میں، کے پی حکومت نے کہا تھا کہ کے ایم یو پہلے سے رجسٹرڈ امیدواروں سے فیس وصول نہیں کرے گا۔ یاد رہے کہ پشاور ہائی کورٹ (پی ایچ سی) نے 6 ہفتوں میں ٹیسٹ دوبارہ کرانے کی ہدایت کی تھی۔

خیبرپختونخوا کا MDCAT اس وقت ایک بڑے تنازع کی زد میں آگیا جب درجنوں طلباء بلوٹوتھ ڈیوائس کا استعمال کرتے ہوئے دھوکہ دہی کرتے ہوئے پکڑے گئے۔ اور پھر ٹیسٹ منسوخ کر دیا گیا اور دوبارہ لینے کا حکم دیا گیا۔

گزشتہ ہفتے کے ایم یو نے امتحان کے دوران نقل کرتے ہوئے پکڑے گئے طلبہ کے خلاف سخت کارروائی کی تھی۔ تفصیلات کے مطابق 219 طلبہ پر دو سال کے لیے ایم ڈی سی اے ٹی دینے پر پابندی عائد کر دی گئی ہے۔