مستحق طلبا کو مفت تعلیم کی فراہمی کی جانب اس سے بڑا قدم کیا کہا جا سکتا ہے، نگراں وزیراعلیٰ سندھ جسٹس (ر) مقبول باقر نے صوبے کے نجی تعلیمی اداروں کے لیے لازمی قرار دے دیا ہے کہ وہ صوبے کے 10 فیصد طلبہ کو مفت تعلیم فراہم کریں۔

سیکرٹری تعلیم کو لکھے گئے خط میں انہوں نے اپنی توجہ 'سندھ رائٹ آف چلڈرن فری اینڈ کمپلسری ایجوکیشن ایکٹ' کی طرف مبذول کرائی ہے اور کہا ہے کہ یہ قانون 2013 سے نافذ ہے لیکن پرائیویٹ تعلیمی ادارے اس پر عمل کرنے میں ناکام رہے ہیں.

انہوں نے خط میں ایکٹ کے باب 4 کے سیکشن 10 کے دو حصوں کا حوالہ دیا ہے، اور سیکرٹری کو ہدایت کی ہے کہ وہ اسے ایک ہفتے کے اندر لاگو کر کے انہیں رپورٹ پیش کریں۔

نگراں وزیراعلیٰ نے ان کی ہدایات پر عمل نہ کرنے والے تعلیمی اداروں کے خلاف کارروائی کرنے کی بھی ہدایت کی ہے۔