نگراں وزیراعظم انوار الحق کاکڑ نے بلوچستان سمیت ملک کے دور دراز علاقوں میں قابل سرکاری ملازمین کی تعیناتی کے لیے جامع پالیسی بنانے کی ہدایت کی ہے۔

انہوں نے سرکاری ملازمین کی روٹیشن پالیسی کو اس کی اصل روح کے مطابق بحال کرنے اور اس پر سختی سے عمل درآمد کو یقینی بنانے کا بھی حکم دیا۔

وزیر اعظم جمعہ کو اسلام آباد میں ایک اجلاس کی صدارت کر رہے تھے جس میں سول بیوروکریسی میں پسماندہ علاقوں کے لیے مختص خالی نشستوں کو خصوصی امتحانات اور روٹیشن پالیسی کے ذریعے پُر کرنے پر پیش رفت کا جائزہ لیا گیا۔ وزیر اعظم کاکڑ نے اقلیتوں اور پسماندہ علاقوں کے لوگوں کے لیے مخصوص سول بیوروکریسی میں خالی نشستوں کو پُر کرنے کے لیے مسابقتی امتحانات کا باقاعدگی سے انعقاد کرنے کی ہدایت کی۔

انہوں نے اقلیتوں کو سرکاری ملازمتوں کے مقابلے کے امتحان میں حصہ لینے کی ترغیب دینے کے لیے مسلسل بیداری مہم پر زور دیا۔ وزیراعظم نے کہا کہ ملک کا آئین اقلیتوں اور پسماندہ علاقوں سے تعلق رکھنے والے لوگوں کو مساوی حقوق اور مواقع فراہم کرتا ہے۔

انہوں نےمزید کہا کہ حکومت ہر شہری کے لیے ترقی کے یکساں مواقع کو یقینی بنانے کے لیے پوری طرح پرعزم ہے۔ اجلاس کو سینٹرل سپیریئر سروسز (سی ایس ایس) کے حال ہی میں منعقد ہونے والے خصوصی امتحان کے بارے میں بھی بتایا گیا۔ امتحان میں 15 ہزار امیدواروں نے شرکت کی جن میں سے 3500 کا تعلق بلوچستان سے تھا۔ امتحان میں بلوچستان کے کوٹے میں 60 سے زائد نشستیں مختص ہیں۔

اجلاس میں وزیراعظم کے مشیر احد خان چیمہ، وزیراعظم کے سیکرٹری، سیکرٹری اسٹیبلشمنٹ اور سیکرٹری فیڈرل پبلک سروس کمیشن نے شرکت کی۔