چیف جسٹس آف پاکستان قاضی فائز عیسیٰ نے قائداعظم یونیورسٹی کے سینڈیکیٹ اجلاس میں بطور ممبر سینڈیکیٹ شرکت کی جس میں طلبہ یونین کو بحال کرنے کا فیصلہ کیا گیا۔

قائداعظم یونیورسٹی اسلام آباد کی سنڈیکیٹ کا اجلاس وائس چانسلر ڈاکٹر نیاز احمد کی زیر صدارت منعقد ہوا۔ ذرائع نے بتایا کہ سپریم کورٹ آف پاکستان کے چیف جسٹس قاضی فائز عیسیٰ نے یونیورسٹی کے سنڈیکیٹ کے رکن کی حیثیت سے اجلاس میں شرکت کی۔

ذرائع کا مزید کہنا ہے کہ طلبہ یونین کی بحالی کے لیے قواعد و ضوابط طے کرنے کے لیے سیکریٹری تعلیم وسیم اجمل کی سربراہی میں ایک کمیٹی بھی تشکیل دی گئی ہے۔

ہائر ایجوکیشن کمیشن (ایچ ای سی) کے نمائندے نے کمیشن کے چیئرمین کی غیر موجودگی میں یونیورسٹی کے سنڈیکیٹ اجلاس میں شرکت کی۔

ذرائع کا کہنا ہے کہ چیف جسٹس قاضی فائز عیسیٰ نے اسلام آباد میں یونیورسٹی کے احاطے میں مسلح پولیس اور رینجرز کی موجودگی پر برہمی کا بھی اظہار کیا۔