حکام نے منگل کے روز کراچی کے گلشن حدید میں غیر رجسٹرڈ نجی اسکول کے احاطے کو ایک لیک ویڈیو اسکینڈل کے سامنے آنے اور اس کے پرنسپل کی گرفتاری کے بعد سیل کردیا۔

عبوری وزیر تعلیم رانا حسین کی ہدایات کے جواب میں ڈائریکٹوریٹ آف پرائیویٹ انسٹی ٹیوشنز نے ڈپٹی کمشنر ملیر کو خط لکھ کر غیر رجسٹرڈ پرائیویٹ اسکول کے احاطے کو سیل کرنے کی درخواست کی۔

بعد ازاں اسسٹنٹ کمشنر بن قاسم کی قیادت میں ایک ٹیم موقع پر پہنچی اور احاطے کو سیل کر دیا۔

عرفان غفور میمن کو کراچی کے گلشن حدید میں اساتذہ اور عملے کے دیگر ارکان کے ساتھ جنسی زیادتی کے الزام میں گرفتار کیا گیا تھا۔

ملزم نے اپنے خلاف ایک ویڈیو اسکینڈل منظر عام پر آنے کے بعد 'سزائے موت' کا مطالبہ کیا ہے۔

اک دیے گئے اپنے بیان میں عرفان نامی گرفتار شخص نے دعویٰ کیا کہ وہ اپنے کام پر شرمندہ ہے اور اسکول کا ایک بھی عملہ ویڈیوز میں نظر نہیں آیا۔

تاہم، سینئر سپرنٹنڈنٹ آف پولیس (ایس ایس پی) ملیر نے تصدیق کی کہ ویڈیوز میں نظر آنے والی خواتین کا تعلق اسکول کے تدریسی عملے سے ہے۔

ایس ایس پی ملیر حسن سردار نے بتایا کہ ملزم پرنسپل نے مبینہ طور پر خواتین ٹیچنگ اسٹاف کو زیادتی کا نشانہ بنایا اور انٹرویو کے لیے آنے والی دیگر خواتین کو بھی پھنسایا۔

ایس ایس پی نے انکشاف کیا کہ ملزم کے موبائل فون پر چار مختلف خواتین کی 25 سے زیادہ فحش ویڈیوز - یہ تمام مختلف اوقات میں ریکارڈ کی گئی تھیں۔

ان کا کہنا تھا کہ ہرممکنہ زاویے سے تفتیش کی گئی، مزید برآں اسکول کے عملے کے بیانات قلمبند کیے جائیں گے۔

ایس ایس پی انویسٹی گیشن علی مردان نے دعویٰ کیا کہ اس گھناؤنے جرم میں مبینہ طور پر ملوث تین افراد جن کی شناخت علی، کاشف اور شکیل کے نام سے ہوئی ہے، اس وقت فرار ہیں۔

علی مردان نے مزید انکشاف کیا کہ تینوں ملزمان کو کیمروں تک رسائی حاصل تھی اور وہ مبینہ طور پر متاثرین کو بلیک میل بھی کرتے تھے، مزید برآں ایک ملزم نے جان بوجھ کر متاثرہ لڑکی کی نازیبا ویڈیو بھی لیک کی۔