خیبرپختونخوا حکومت نے پبلک سیکٹر پرائمری سکولوں میں مفت کھانے کا پروگرام شروع کرنے کا فیصلہ کیا ہے۔

صوبے بھر کے تمام ڈویژنل ہیڈ کوارٹرز کے شہری علاقوں کے پرائمری سکولوں میں بچوں کو مفت کھانا فراہم کیا جائے گا۔

یہ فیصلہ وزیر اعلیٰ علی امین خان گنڈا پور کی زیر صدارت اجلاس میں کیا گیا۔

صوبائی وزیر پرائمری اینڈ سیکنڈری ایجوکیشن فیصل خان ترکئی، وزیر اعلیٰ کے مشیر خزانہ مزمل اسلم، ایڈیشنل چیف سیکرٹری پلاننگ اینڈ ڈویلپمنٹ سید امتیاز حسین شاہ اور ایک نجی فلاحی تنظیم اللہ والے ٹرسٹ کے چیف ایگزیکٹو آفیسر شاہد لون اور دیگر بھی اس موقع پر موجود تھے۔

فیصلہ کیا گیا کہ ابتدائی طور پر ایبٹ آباد اور سوات میں اس اقدام کو پائلٹ بنیادوں پر شروع کیا جائے گا جسے بعد میں دیگر ڈویژنل ہیڈ کوارٹرز تک بڑھایا جائے گا۔

بیان میں کہا گیا ہے کہ پروگرام کے تحت تقریباً 70,000 بچوں کو روزانہ مفت اور معیاری خوراک فراہم کی جائے گی، اس پروگرام پر سالانہ 500 ملین روپے کا تخمینہ لگایا گیا ہے، جو صوبائی حکومت برداشت کرے گی۔

مزید فیصلہ کیا گیا کہ محکمہ سماجی بہبود مجوزہ اقدام پر عمل درآمد کے لیے نجی فلاحی تنظیم کے ساتھ مفاہمت کی یادداشت پر دستخط کرے گا۔

اس موقع پر خطاب کرتے ہوئے وزیر اعلیٰ علی امین خان گنڈا پور  نے کہا کہ یہ پروگرام ان کی حکومت کا ایک اور اہم فلاحی اقدام ہے۔ انہوں نے مزید کہا کہ اس سے سرکاری اسکولوں میں داخلہ بڑھانے میں بھی مدد ملے گی۔

مسٹر گنڈا پور نے کہا کہ لوگوں پر زیادہ سے زیادہ وسائل خرچ کرنا سابق وزیر اعظم عمران خان کے وژن کا حصہ ہے اور ان کی حکومت ایسے مزید فلاحی منصوبے بھی شروع کرے گی۔

انہوں نے متعلقہ حکام کو ہدایت کی کہ اس اقدام کو مؤثر طریقے سے نافذ کرنے کے لیے جلد از جلد ایکشن پلان کو حتمی شکل دیں۔